RA 11765: Oryentasyon Para sa Kooperatiba

Sumailalim sa isang oryentasyon ang 99 na kinatawan mula sa mga rehistradong kooperatiba sa La Union noong Agosto 17, 2026 sa Bauang North Central School upang talakayin ang Republic Act 11765 o ang Financial Products and Services Consumer Protection Act, iniulat ng PGLU.

Layunin ng aktibidad na ihanda ang mga lokal na kooperatiba sa pagpapatupad ng Financial Consumer Protection Assistance Management System (FCPAMS). Sa pamamagitan ng pakikipagtulungan ng Provincial Cooperative Development Office (PCDO) at Cooperative Development Authority (CDA), layon nitong palakasin ang kaalaman sa pananalapi at protektahan ang karapatan ng bawat miyembro.

Tinalakay sa pagtitipon ang kahalagahan ng pagkakaroon ng malinaw at tapat na pamamalakad upang mapanatiling matatag ang operasyon ng mga kooperatiba. Pinangunahan ng CDA-Region 1 Extension Office ang talakayan sa pangunguna nina Supervising Cooperative Development Specialist Edilberto G. Unson, Acting Senior Cooperative Development Specialist Arlene C. Espinoza, at Senior Research Specialist Jim Ian A. Bautista.

Kasama rin sa mga dumalo upang magbigay-gabay sina Bauang Municipal Cooperative Development Officer Mercedes S. Tejada, Cooperative Development Specialist II Rocelyn C. Banayat, at Constancia A. De Guzman.

Upang makasunod sa bagong sistema ng FCPAMS, kailangang buuin ng mga kooperatiba ang mga sumusunod:

• Consumer Assistance Team o pangkat na tutulong sa mga mamimili;
• Mga opisyal na patakaran at pamamaraan (Policies and Procedures); at
• Pormal na pag-apruba ng Board of Directors (Board Approval).

Itinakda naman sa Disyembre 31, 2026 ang huling araw ng pagtalima o compliance deadline para sa mga Micro at Small Cooperatives sa lalawigan.

---

SOURCE: PGLU